قال فؤاد القاضي مرشح حزب الشعب الجمهوري بانتخابات مجلس الشيوخ، إننا نواجه الكثير من المخاطر، موضحًا: ” احنا شايفين سد النهضة في الجنوب وفي الغرب ليبيا وتركيا بتلعب في ليبيا وعايزين يبعتوا لنا ارهاب وياخدوا الغاز بتاعنا اللي في البحر المتوسط، وشايفين تركيا بتحرك مراكب كل شوية ويقولك بيدوروا علي الغاز، الغاز ده حقك وحقي ياعم الحاج، انت فاهم تركيا عايزة تسرقنا، وفي الغرب تلاقي الارهاب وتلاقي الدنيا بايظة”.
وأضاف القاضي في مؤتمر شعبي بالتبين في جنوب القاهرة: “أنا مش جاي اقول لكم انزلوا انتخبوني او انتخبوا فلان لكن بل لكم انزلوا شاركوا لان في مؤامرات كتيرة حولين البلد” مضيفا:”ازاي وافقت تعمل كذا وانا اقول لكم واوضح انا وافقت ليه وانا وكل النواب منتخبين من الشعب، احنا مش بهوات احنا كل اللي يهمنا بلدنا وشعبنا العظيم ، وانا بقولها لكم كلمة واحدة توحد الله بحق ربنا انا ممكن ابقي قاعد وسطكوا واموت لازم اخاف من ربنا”.
وأكد فؤاد القاضي: “متعرفش الإرهابيين دول جنس ملة أهلهم ايه وعايزين يقتلوا ولادنا وهما الشرطة والجيش دول مين ما دول ولادنا، السيناوية والناس اللي اتقلت وهما بيصلوا الجمعة لما ضربوهم بالنار دول ولادنا فاحنا دلوقتي لازم ننزل ونشارك ونقول كلمتنا، مش مهم كلمتك هتكون مع مين لكن المهم تقول للأعادي وللناس اللي بتعادي مصر احنا واقفين مع بعض وقفة رجالة، حتي لو في اي حاجة احنا حابين بعض واحنا واحد،مش عايزين حد يسرقنا لا تركيا ولا قطر ولا حد من الشرق ولا حد من الغرب دي فلوسنا ودي حياتنا ودول عيالنا لازم نحافظ عليهم”.
واستكمل مرشح حزب الشعب الجمهوري: “محدش يقولي هنعمل ايه بمجلس الشيوخ ما هو المجلس اللي هيظبط القوانين بتاعة مجلس النواب مجلس النواب ومجلس الشيوخ في خدمة الوطن وشعب مصر العظيم، وهو اللي ايده في القرارات الحكومية وايده في قرارات رئيس الجمهورية وهو اللي ايده في الاتفاقيات الدولية اللي بتعود بالخير علي مصر، متقولش انا هنزل مجلس النواب بس ما ده زي ده وده بيكمل ده حتي الجماعة بتوع السياسة بتوع الجامعات اللي لابسين بدل بيسموها الغرفة الأولي لمجلس النواب والغرفة الثانية مجلس الشيوخ”.
وأنهي حديثه بالتأكيد علي ضرورة النزول للمشاركة في انتخابات مجلس الشيوخ، بقوله: “متخلوش حد يخدعكوا ويقول لكم متنزلوش، دي مصلحتك لو كنت شغال في مصنع او بياع او علي باب الله ، مجلس الشيوخ ده خير لينا كلنا، لما القانون يطلع صح محدش هيعترض عليه وهيتنفذ وبلدنا تبقي بخير، عايزين نراجع علي القوانين وتبقي الناس بتوعك هما اللي بيعملوا القوانين وهما اللي بيراجعوا عليها، وممكن تحاسبوهم كمان وتقولوا تعالي يا فؤاد انت ازاي وافقت تعمل كذا وانا اقول لكم سمعة وطاعة انا وكل النواب منتخبين من الشعب، احنا مش بهوات احنا خدامين عند الشعب، وانا بقولها لكم كلمة واحدة توحد الله بحق ربنا انا ممكن ابقي قاعد وسطكوا واموت لازم اخاف من ربنا”.
