عبرت الإعلامية ريهام سعيد، عن حزنها من حالة الهجوم التى تتعرض لها، وذلك بعد عرض حلقة من برنامج «صبايا الخير»، على قناة النهار، قامت من خلالها برحلة برية مع مجموعة من الصيادين لاصطياد الذئاب والثعالب
وقالت ريهام سعيد، فى مقطع فيديو على صفحتها الشخصية على موقع «فيس بوك»: «أنا تربيت فى منزل طول عمره فيه حيوانات، وكان عندى سنجاب وقنفذ ونسر، وطلعت الصور بتاعة ابنى إمبارح اللى ماسك فيها الحيوانات»، مؤكدة أن فكرة تجارتها بالحيوانات وأنها إنسانة بلا رحمة غير حقيقية خاصة من الأشخاص المقربين منها والذين يعرفون مدى علاقتها وحبها للحيوانات
واعتذرت ريهام سعيد، خلال رسالتها عن مشهد صور اصطياد الحيوانات التى تسببت فى أذى مشاعر جمهورها المتابعين، لافتة إلى أنها فى النهاية ليست المسئولة عن هذا المشهد، قائلة: «إحنا قلنا عايزين نركز على مهنة صيد الحيوانات وأنا مخلتش الراجل يصطاد الحيوانات بالطريقة الصعبة دي عشان اصور، وأنا رايحة أصور رحلة صيد ذئاب وثعالب فقط»
وتابعت: «أنا معرفش احنا هنصطاد أيه، وأنا طالعة رحلة صيد زى أى حد ودى طريقتهم اللى بيصطادوا بيها، وأنا مليش دخل بيها، ومهنة الصيد موجودة لأغراض كثيرة منها علمية ومنها تجارية، وأنا وظيفتي تغطية رحلة الصيد وواضح من الحلقة وكلامي فى الآخر إني مش مبسوطة من الطريقة اللى بيصطادوا بيها، وده ظهر فى تعبيرات وجهى خلال التصوير، مؤكده على أن هذه الطريقة المرفوضة للصيد بالنسبة للجمهور ولها هى أيضا، إلا أنها لا تعرف الطريقة الصحيحة للصيد»، متابعة: «أنا معرفش طريقة الصيد الصح، وطبعا حق الناس تزعل، لكن متبقاش ريهام عملت حلقة لتعذيب الحيوانات عشان تكسب مشاهدة»
وأكدت ريهام سعيد، أن البرنامج سلط الضوء على ملف الإعلام لم يتطرق له من قبل، وأن برنامجها قائم على الحقيقة وتسليط الضوء على الحقيقة بحلوها ومرها
وأبدت ريهام سعيد، تعجبها من عدم تسليط الضوء نهائيا على طريق الصياد فى صيد الثعالب والذئاب، قائلة: «محدش خالص جاب سيرة الصياد ولا طريقة الصيد وكله عليا أنا وأنا مالي، والصيادين بيصطادوا الثعالب والذئاب بهذه الطريقة من 50 سنة أبا عن جد، وأنا مليش علاقة بالصيد»
ووجهت ريهام سعيد رسالة إلى الجمهور: «أنتم شفتوا طريقة الصيد غير مرضية بتعدموني أنا ليه وأنا مخترعتيش الطريق دي، ولا قلت للصيادين يصطادوا، وأنا غطيت حاجة بتحصل بمنتهى الصدق وليه الصدق بيضايق؟ وأرجوا من الجمهور عدم تكرار الغلطة وبلاش كل مرة اتظلم واتاخد مع التيار»
وأضافت: «فى ناس ضدى وناس مضيقة إنى طلعت البرنامج ده وناس مستأجرة عشان تتدخل جوه الحملة دي وتعمل هاشتاجات ضدي، والبرنامج بتاعي هادف وبيعالج ناس وبرنامج وطني وشريف وبيقدم كل ما هو مفيد، والحلقة دى مفيدة جدا لو هتخلي كل الصيادين يغيروا طريقة الصيد يبقى أنا عملت خير كتير للحيوانات»
وفي نهاية حديثها قالت: «أنا اعتذر عن المشاهد السيئة لصيد الحيوانات ولكن فى شغل ممنهج ضدي، وأنا موقفة بقالى سنة ونص ولسه راجعة البرنامج وعايزة اقدم حاجة كويسة وحاجة هادفة وبنقدم فرح وبحاول أرضي الذوق العام للمشاهد»
موضوعات متعلقة :
