دعا فؤاد القاضي القيادي بحزب الشعب الجمهوري، المصريين للنزول إلى اللجان الانتخابية داخل وخارج مصر لإبداء رأيهم في مرشحي مجلس الشيوخ، موجهًا تنبية للمواطنين بقوله: “اوعي تخلي حد يقولك متنزلش أو اختارني أنا ومتختارش غيري.. احنا في عصر الزعيم عبدالفتاح السيسي، بنعيش بحرية وكرامة.. وكمان اوعي تخلي حد يخليك تتنازل عن حقك ويقولك بلاش تنزل والكلام الفارغ ده لانه بكده بيأذيك وعايز ميكونش لك قرار في حياتك”.
وأضاف القاضي في تصريح خص لموقع “تحت القبة”: “انزل وقول كلمة حق بتصويتك، دافع عن بلدك ضد مخططات الإخوان واللى وراهم، متخليش أردوغان في تركيا يطلع لسانه للشعب المصري ويقول إنه بيتحكم في قرارنا عن طريق فلوسه اللى بيدفعها للخونة عشان يقللوا ثقة المصريين في نفسهم ومؤسساتهم، خليك راجل ودافع عن بلدك وخلي مؤسسات بلدك مستمرة وبتشتغل، ولو في أخطاء في أى وقت فكل ده طبيعي ومع الوقت الحياة بتتطور لكن اللى مش هيبدأ هو اللى هيخسر كتير”.
وأرجع القيادي بحزب الشعب الجمهوري، المؤمرات التى تحيط بمصر إلى محاولات تركيا وقطر الفاشلة في التدخل في الشأن الداخلي، قائلًا: “زي ما شايفين تركيا وقطر بيبعتوا لنا إرهابيين في سينا بيحاولوا يقتلوا ولادنا اللى بيحموا الحدود، وتبص على الحدود مع ليبيا تلاقيهم بيدفعوا لبلطجية عشان يحاولوا يدخلوا مصر من الناحية الغربية، وشوية تلاقيهم بيدفعوا في إعلامهم عن سد النهضة الاثيوبي وبيشجعوا أثيوبيا تقطع المياه عن المصريين”.
ووجه رسالة للشعب المصري كاشفًا فيها مؤامرة قنوات مكلمين والشرق والجزيرة الإخوانية، قائلًا: “بعد كل ده لسه بتصدقوا اللى يقولكم متنزلوش تعبروا عن حريتكم ورأيكم ولا هتصدقوا اللى يقولك فلان بيدافع عن الجيش والشرطة وبلاش تنتخبوه، والله عيب علينا يا مصريين.. فوقوا يا ناس فوقوا يا ناس.. متخلوش حد يلعب بيكم”.
واستكمل فؤد القاضي مؤكدًا على أن المصريين أقوياء، مضيفً: “احنا كبار أوي ومحدش يقدر علينا وفي ضهرنا وقدمنا وحولينا محروسين بجيش وشرطة كلهم رجالة مستعجدين يضحوا بروحهم بدون تفكير.. كل ده عشانك انت وأنا نعيش بكرامة وحرية.. يبقي بعد كل ده حضرتك حد يلعب في دماغك أو يقولك كلمتين فتقوم متنزلش تختار الناس اللى هيبقوا نواب عنك أنت في مجلس الشيوخ وبعد كده مجلس النواب.. والله ميصحش”.
